Böyük bir cinayətkar qrupun 35 üzvü saxlanıldı

Türkiyədə Jandarma və Artvin Vilayət Prokurorluğunun birgə əməliyyatı zamanı mütəşəkkil cinayətkar qrupa mənsub olmaqda şübhəli bilinən 35 nəfər saxlanılıb.

Əməliyyatlar Artvin, İstanbul, İzmir və Ərzurumda Jandarmanın qaçaqmalçılıq, mütəşəkkil cinayətkarlıq və kibercinayətkarlıqla mübarizə bölmələrinin iştirakı ilə keçirilib.

Müstəntiqlərin sözlərinə görə, şübhəlilər onlayn fırıldaqçılıqla məşğul olublar: vəkil kimi çıxış edərək vətəndaşları çaşdırıblar, pul köçürmələri tələb ediblər və ödəniş etməkdən imtina edənləri hədələyiblər. Əməliyyat nəticəsində 28 nəfər həbs edilib, yeddi nəfər isə məhkəmə nəzarəti altında azadlığa buraxılıb.

Maliyyə kəşfiyyatı xidməti olan MASAK-ın məlumatına görə, şübhəlilərin hesablarında 510 milyon türk lirəsi dövriyyənin olduğu aşkar edilib. Daşınmaz əmlak, nəqliyyat vasitələri və yüzlərlə bank hesabı da daxil olmaqla təxminən 75 milyon lirə dəyərində əmlak müsadirə edilib. Axtarışlar zamanı rəqəmsal media və sənədlər müsadirə edilib.