Türkiyə "Formula - 1" Qran Prisinə ev sahibliyi etmək üçün beş illik müqavilə imzaladı

Türkiyə Qran Prisi 2027-ci ildən etibarən "Formula - 1" Dünya Çempionatı təqviminə qayıdacaq.

Yarışın İstanbul trasında keçirilməsi ilə bağlı razılaşma beş illik müddətə bağlanıb.

Müvafiq bəyanat Türkiyə liderinin ofisi tərəfindən yayılıb.

"Türkiyə Qran Prinin İstanbul trasına qayıtmasını qürurla elan edir və bu tras 2027-ci ildən başlayaraq ən azı beş il ərzində "Formula - 1" cədvəlində yenidən görünəcək. Bu tarixi qərar Türkiyə avtoidmanı tarixində mühüm bir fəsli canlandırır və İstanbulu həyəcanverici yarışların unikal mədəni irslə ahəngdar şəkildə tamamlandığı dünya səviyyəli bir məkan kimi təsdiqləyir", - Prezident Administrasiyasının Kommunikasiya İdarəsinin mətbuat açıqlamasında bildirilib.