ÜST ölümcül Nipah virusu ilə bağlı həyəcan təbili çalır

Ümumdünya Səhiyyə Təşkilatı (ÜST) patogen haqqında kifayət qədər məlumat olmadığı üçün Nipah virusunun daha da yayılması potensialı barədə xəbərdarlıq edir, təşkilatın Cenevrədəki rəsmi nümayəndəsi Tarik Jazareviç bildirib.

Jazareviç qeyd edib ki, "Nipah virusunun təbii rezervuarının - yarasaların - Hindistan və Banqladeşin bəzi bölgələrində, o cümlədən Qərbi Benqalda mövcudluğunu nəzərə alsaq, daha çox yoluxma riski var". O, əlavə edib ki, xurma şirəsinin istehlakı da daxil olmaqla, risk faktorları barədə ictimaiyyətin məlumatlılığını artırmaq vacibdir.

Nipah virusu çox təhlükəli bir patogendir; onun üçün heç bir peyvənd və ya spesifik müalicə yoxdur. O, ilk dəfə 1999-cu ildə Malayziyada donuz fermerləri arasında baş verən epidemiya zamanı aşkar edilib. ÜST-ün məlumatına görə, infeksiyadan ölüm nisbəti 40%-dən 75%-ə qədərdir.