Türkiyədə 324 İŞİD şübhəlisi saxlanılıb

Türkiyədə İŞİD terror təşkilatına qarşı genişmiqyaslı əməliyyatlar zamanı 324 nəfər saxlanılıb.

Bu barədə Türkiyə Daxili İşlər Nazirliyi məlumat yayıb.

Əməliyyatlar Baş Təhlükəsizlik İdarəsi, Milli Kəşfiyyat Təşkilatı (MİT) və Respublika Prokurorluğunun koordinasiyası altında ölkə daxilində 47 əyalətdə həyata keçirilib.

Nazirliyin məlumatına görə, saxlanılanlar arasında əvvəllər axtarışda olan, İŞİD-i maliyyələşdirməkdə şübhəli bilinən şəxslər və əvvəllər onun sıralarında fəaliyyət göstərən terror təşkilatının üzvləri var.

Daxili İşlər Nazirliyi terrorçu strukturlara qarşı əməliyyatların "ilin 365 günü" davamlı olaraq davam etdiyini vurğulayıb.

Nazirlik həmçinin polisə, kəşfiyyata, prokurorluğa və xüsusi əməliyyatlarda iştirak edən bütün şəxslərə təşəkkür edib.