Qazaxıstan və Azərbaycan “TourAn” birgə turizm şirkətini təsis edib

Qazaxıstan-Azərbaycan birgə tur operatoru "TourAn"ın rəsmi açılış mərasimi Bakıda keçirilib. Şirkət Qazaxıstan və Azərbaycan arasında turizm əməkdaşlığını inkişaf etdirməyi hədəfləyir.

 

AZpress.AZ xəbər verir ki, layihəyə turizm bazarlarında təcrübəsi olan və beynəlxalq layihələr həyata keçirən Discover Jetisu (Qazaxıstan) və Smile Azerbaijan Tour MMC (Azərbaycan) şirkətləri təşəbbüs göstərib. Təsis sənədləri Qazaxıstanın Azərbaycandakı səfirliyində Discover Jetısunun direktoru Aleksandr Alnazarov və Smile Azerbaijan Tour MMC-nin direktoru Narina Mahmudova arasında imzalanıb.

 

Yeni tur operatorunun nizamnamə kapitalı 100.000 dollardır və səhmlər tərəflər arasında bərabər bölünüb. Şirkətin fəaliyyəti ekoturizm, mədəni və qastronomik turlar, eləcə də tibbi və işgüzar turizm daxil olmaqla geniş turizm xidmətlərini əhatə edəcək.

 

Qazaxıstanın Azərbaycandakı səfiri Alim Bayel qeyd edib ki, vahid tur operatorunun yaradılması ikitərəfli əməkdaşlığı daha da gücləndirəcək və regionun vahid turizm məkanı kimi beynəlxalq cəlbediciliyini artıracaq. Onun sözlərinə görə, son illərdə qarşılıqlı turizm mübadiləsində müsbət dinamika müşahidə olunur və bu cür təşəbbüslərin həyata keçirilməsi turist axınının daha da artırılmasına yönəlib.

 

Diplomat xatırladıb ki, 2024-2025-ci illərdə Qazaxıstanın Bakıdakı səfirliyi sənaye əməkdaşlığının inkişaf etdirilməsinə yönəlmiş iki Qazaxıstan-Azərbaycan turizm forumu təşkil edib.

 

Hazırda Qazaxıstan və Azərbaycan arasında geniş hava əlaqəsi mövcuddur. Air Astana, FlyArystan və Azerbaijan Airlines tərəfindən Bakı ilə Astana, Almatı, Aktau, Atırau və Şimkent arasında birbaşa uçuşlar həyata keçirilir. Həftədə ümumi uçuş sayı 30-dan çoxdur.

 

"TourAn"ın istifadəyə verilməsinin iki ölkənin turizm sənayesinin inkişafında mühüm addım olacağı, investisiya fəaliyyətinin artmasına və beynəlxalq bazarlarda birgə turizm məhsullarının genişləndirilməsinə kömək edəcəyi gözlənilir.

Xeyransa İsmayılova