“Zəfərin mübarək, Vətən!” şeiri kitabxanaya təqdim olundu

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasına “Yaradıcı oxucularımız” layihəsi çərçivəsində  kitabxananın Fəxri oxucusu, şair, publisist, Prezident təqaüdçüsü, AYB-nin və AJB-nin üzvü, Türkiye İlim ve Edebiyat Eseri Sahibləri Meslek Birliyi (İLESAM), Avrasya Sanat Kültür Edebiyat və Bilim Federasyonu (ASKEF), Türkmən Ədəbiyyatı Yazarlar Birliyinin üzvü, Azərbaycan Respublikasının İnsan Hüqüqları üzrə Müvəkkili (Ombudsman) aparatının əməkdaşı Azadə Novruzova yeni şeir təqdim etdi.

Mərkəzi Kitabxanada keçirilən bir çox layihələrdə yaxından iştirak edən Azadə Novruzova “Ovunmayan həsrət”, “Sən mənim ağ kitabım” adlı bədii əsərlərin və 200-dən çox elmi-publisistik məqalənin müəllifidir. Müəllifin Vətən mövzusundan, Qarabağ həqiqətlərindən, Xocalı faciəsindən bəhs edən bədii yaradıcılıq nümunələri rus, ingilis, türk, yapon, ərəb, fars dillərinə tərcümə edilərək xarici ölkələrdə yayılıb.
Şair “Zəfərin mübarək, Vətən!” şeirdə Qarabağ acısının, Şuşa həsrətinin bitdiyini tərənnüm edir, “bircə Bayraq, bir Komandanla əbədi olsun Qələbən!” – deyir.

Zəfərin mübarək, Vətən!

Bitdi Qarabağ acımız,
Bitdi Şuşa həsrətimiz.
Həsrəti ilə yandığımız
Təbriz, Zəngəzur, Göyçəmiz,
BÜTÖV AZƏRBAYCANIMIZ!

Nə qaldı ki, beşcə-üşcə gün arada
Sayıb bitirək bunu tez.
Gələk çataq Çınqıllıya.
Öpək gözündən VƏTƏNİN.
Sığal çəkək tellərinə.

Yol gözləyən yolun, izin
Dolanıb qurbanın kəsək.
Əl çəkib evin-eşiyin
Toz basmış bucağın silək.
Gül əkək, çiçək bitirək
Dörd bir yanın Cənnət edək.

Perik düşən ruhları biz
Yad eləyib, şad eləyək.
Bütövləşsin Vətənimiz!
Bircə Bayraq, bir Komandan,
Əbədi olsun, QƏLƏBƏN!
ZƏFƏRİN, MÜBARƏK VƏTƏN!