Qətər 2036-cı il Olimpiadasına ev sahibliyi etmək üçün BOK ilə danışıqlar aparır

Qətər Olimpiya Komitəsi 2036-cı il Olimpiya və Paralimpiya Oyunlarına ev sahibliyi edəcək ölkənin seçilməsi prosesi çərçivəsində Beynəlxalq Olimpiya Komitəsi (BOK) ilə danışıqlar aparır.

Bu barədə BOK-un bəyanatında deyilir.

Qətər Olimpiya Komitəsinin prezidenti Yohan bin Həməd Al-Taninin sözlərinə görə, hazırda ölkədə yarış üçün lazım olan idman infrastrukturunun 95%-i hazırdır.

"Bizim bütün obyektlərin 100% hazır olmasını təmin etmək üçün hərtərəfli milli planımız var. Bu plan sosial, iqtisadi və ekoloji cəhətdən davamlı miras yaratmağa yönəlmiş uzunmüddətli baxışa əsaslanır" dedi.

Qətər Yaxın Şərqdə Olimpiya Oyunlarına ev sahibliyi etmək hüququ qazanan ilk ölkə ola bilər. 2022-ci ildə ölkə futbol üzrə dünya çempionatına ev sahibliyi etdi. Ümumilikdə, ölkədə 10 il ərzində olimpiya növləri üzrə altı dünya çempionatı keçirilib.