“Qayıdışın mübarək, Zəngilan!” adlı videoçarx hazırlandı

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) Ə.Vahid adına 1 №-li kitabxana filialının kitabxanaçı-informasiya texnologiyaları üzrə mütəxəssisi Səidə Rəcəbova Azərbaycan Respublikası Prezidentinin Sərəncamı ilə 20 oktyabr Zəngilan şəhəri günü elan edilməsi ilə əlaqədar “Qayıdışın mübarək, Zəngilan!” adlı videoçarx hazırladı.

Videoçarx Ulu Öndərin Zəngilan haqqında dediyi sözlərlə başlanır. Daha sonra qeyd edilir ki, 1930-cu ildə yaradılan Zəngilan rayonu Azərbaycan Respublikasının cənub-qərbində yerləşir və rayon mühüm strateji əhəmiyyətə malikdir. Rayonun müəssisələrinin, tarixi abidələrinin, təbiətinin  işğaldan əvvəlki tarixi fotoları verilir.

İşğala ən son məruz qalan, 1988-ci ildən 1993-cü ilin noyabrınadək düşmənə baş əyməyən, yağı hücumlarına sinə gərən, yüzlərlə şəhid verən Zəngilan 1993-cü il oktyabrın 29-da Ermənistan silahlı qüvvələri tərəfindən işğal edildi.   

Zəngilan rayonunda ən böyük çinar meşələri və digər qiymətli ağacların işğalçı Ermənistan silahlı qüvvələri tərəfindən məhv edilməsi, molibden, mərmər, qızıl, qranit və digər yeraltı sərvətlərin, 1974-cü ildə yaradılan Bəsitçay Dövlət Təbiət Qoruğununun, orada yerləşən qədim tarixi abidələrin dağıdılıb talan olunması  barədə məlumatlar verilir.

2020-ci il oktyabr ayının 20-də Azərbaycan Silahlı Qüvvələri tərəfindən Zəngilan rayonu işğalçılardan azad olundu.

Videoçarxda Azərbaycan Respublikasının Prezidenti cənab İlham Əliyevin rayonda abadlıq və quruculuq işlərinin aparılması haqqında da məlumat var.