Yanvarın 13-də Azərbaycan, Böyükbritaniya, Kipr və Malta millisinin iştirakı ilə Bakı İdman Sarayında startı verilən kişi həndbolçularının Avropa çempionatının (AÇ-2026) təsnifat oyunlarına bu gün sayca 3-cü olan son tururn oyunları ilə yekun vurulub. Son turun ilk oyununda Böyükbritaniya millisi ilə Malta qarşılaşıb. Matç britaniyalıların 30 top fərqli qələbəsi ilə başa çatıb - 44:14. Günün və turun növbəti oyunu isə turnirə ev sahibliyi edən Azərbaycan yığmasıyla Kipr komandası arasında olub. Maraqlıdır ki, təsnifat oyunlaına Malta üzərində 9 top fərqli qələbəylə başlayan yığmamız finişə eyni fərqli məğlubiyyətlə çatıb. İlk hissədən üstünlüyü ələ alan (15:18) Kipr komandası sona qədər təşəbbüsü əldən verməyib və meydanı 32:23 hesablı qələbəylə tərk edib. Bununla da doğma divarlar arasında çıxış edən Azərvaycan öz azarkeşləri qarşısında ikinci dəfə məğlubiyyətlə üzləşib. Bu isə turnirə baş məşqçi Nasser Salimi və onun köməkçisi Rəşad Hüseynovun rəhbərliyi altında qatılan Azərbaycan millisinə yalnız qrup üçüncüsü olmaq imkanı verib. Reqlamentə əsasən qrupda ilk üç yeri tutan komandalar AÇ-2026-nın növbəti təsnifat mərhələsində iştirak etmək hüququ qazanıb. Bu isə o deməkdir ki, yığmamız mübarizəni növbəti mərhələdə davam etdirəcək. 

Üç gün davam edən turnirdə baş tutan bütün oyunların nəticələrini təqdim edirik: 

1-ci tur: Azərbaycan - Malta - 34 - 25;  Kipr - Böyükbritaniya - 25:25,

2-ci tur: Azərbaycan - Böyükbritaniya - 22:39; Malta - Kipr - 26:47, 

3-cü tur: Azərbaycan - Kipr - 23:32; Malta - Böyükbitaniya - 14:44. 

Кomandaların yekun turnir cədvəli:

İNTİQAM MƏMMƏDOV