İordaniya senatoru Ermənistanın hərbi təxribatlarını sərt şəkildə pisləyib -

İordaniya senatoru Ermənistanın hərbi təxribatlarını sərt şəkildə pisləyib

Azərbaycanın Tovuz rayonu istiqamətində dövlət sərhəddində Ermənistan silahlı qüvvələrinin təxribatlar törətməsinə İordaniya-Azərbaycan Parlamentlərarası Dostluq Komitəsinin rəhbəri, senator Mərvan Abdulhəlim ən-Nəmr əl-Hmud kəskin münasibət bildirib.

İordaniya–Azərbaycan Dostluq Cəmiyyətinin sədri Zümrüd Dadaşova bildirib ki, senatorun verdiyi bəyanatda Azərbaycanın dövlət sərhədlərinin yaxınlığındakı hərbi obyektlərə və yaşayış məntəqələrinə Ermənistanın silahlı qüvvələrinin artilleriya zərbələri endirilməsi, ölkəmizin hərbçilərinin və dinc sakinlərinin qətlə yetirilməsi faktları hiddətlə pislənilib. Şəhid ailələrinə və bütün Azərbaycan xalqına dərin hüznlə başsağlığı verən senator yaralılara tezliklə sağalmalarını arzulayıb.

O, bir daha nəzərə çatdırıb ki, İordaniya Haşimilər Krallığı müstəqil Azərbaycan Respublikasının ərazi bütövlüyünü dəstəkləyir, Dağlıq Qarabağı Azərbaycanın əzəli torpağı və ayrılmaz tərkib hissəsi olaraq tanıyır. Senator Mərvan əl-Hmud əlavə edib ki, rəhbərlik etdiyi İordaniya-Azərbaycan Parlamentlərarası Dostluq Komitəsi hər zaman Azərbaycanın mövqeyini dəstəkləyəcək.

Senator işğalçı dövlət olan Ermənistanı regionda hərbi təcavüzə son qoymağa və gərginlik yaratmamağa çağırıb.

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !