Lənkəran Dövlət Universitetində açıq qapı günü və məzun yarmarkası keçirilib - + FOTO (AZpress.AZ – Ağaddin Babayev, Lənkəran)

Lənkəran Dövlət Universitetində açıq qapı günü və məzun yarmarkası keçirilib + FOTO (AZpress.AZ – Ağaddin Babayev, Lənkəran)

Lənkəran Dövlət Universitetində (LDU) “Məzun-2017” proqramı çərşivəsində açıq qapı günü və məzun yarmarkası keçirilib. Lənkəran Şəhər İcra Hakimiyyəti (ŞİH) ilə birgə təşkil olunan tədbirin əsas məqsədi tələbə-məzunlara aldıqları ixtisaslar üzrə əmək bazarında olan tələbat haqqında məlumat vermək, işəgötürənlərlə onların bilavasitə qarşılıqlı ünsiyyətini təşkil etmək və bununla da, işəgötürənlərin qısa vaxt ərzində müasir tələblərə cavab verən ixtisaslı kadrların seçiminin aparılmasına imkan yaratmaqdan ibarət olub.


Açıq qapı günündə rayon rəsmiləri, LDU-nun bu ilki məzunları, valideynlər, rayon məşğulluq idarəsinin və işəgötürən sifarişçi təşkilatların nümayəndələri iştirak ediblər. İştirakçıları LDU-nun rektor vəzifəsini icra edən, riyaziyyat elmləri doktoru, professor Natiq İbrahimov salamlayaraq, bu elm ocağı barədə onlara ətraflı məlumat verib, tədrisin maddi-texniki bazasının yenilənməsi, keyfiyyətli mütəxxəssislərin hazırlanması istiqamətində son bir ildə görülmüş işlərdən söz açıb.

 

Əmək yarmarkasının keçirilməsinin vacibliyini qeyd edən professor N.İbrahimov belə tədbirlərin bu il LDU-nu bitirən 500-ə qədər məzuna iş probleminin həllində dəstək olacağına əminliyini ifadə edərək, əmək yarmarkalarının gənclərin məşğulluğunun təminində əhəmiyyətli rol oynadığını, işçi ilə işəgötürən arasında operativ körpü olduğunu bildirib.

 


Lənkəran ŞİH başçısının şəhər təsərrüfatı üzrə müavini Möhübbət Babayev, icra başçısının sosial iqtisadi məsələlər üzrə müavini Xalid Rəhimov, Lənkəran Rayon Məşğulluq Mərkəzinin direktoru Rahib Quliyev, mebel emalı və satışı üzrə ticarət mərkəzinin direktoru Elnur Əliyev, Bakı Biznes Tədris Mərkəzinin Lənkəran nümayəndəliyinin rəhbəri Firdovsi Axundov, “Gilan Holdinq”in insan resursları şöbəsinin rəhbəri Coşqun İmanquliyev və digərləri çıxışlarında tədbirin böyük əhəmiyyətindən bəhs edərək təklif və rəylərini bildiriblər.


Əmək yarmarkasına təkcə Lənkəranda yox, umumiyyətlə, cənub bölgəsinin digər rayonlarında fəaliyyət göstərən 27 dövlət və özəl müəəssisə 140 boş (vakant ) iş yeri çıxarıb. Təklif olunan boş (vakant ) yerlərə bu ilki məzunlardan 270 nəfər iştirak ərizəsini təqdim edib.


Tədbir iştirakçıları belə bir tədbirin təşkilinə, yuxarı kurslarda təhsil alan, xüsusən ali təhsil ocaqlarını bitirərək əmək fəaliyyətinə başlamaq ərəfəsində olan məzunlarla işəgötürənlər arasında ilkin əlaqələrin qurulmasına, onlarda müasir əmək bazarı barədə dolğun məlumat yaratdıqlarına görə təşkilatçılara öz təşəkkürünü bildiriblər.


Qeyd edək ki, bu, LDU-da təşkil olunan ilk açıq qapı günü və əmək yarmarkasıdır.

 

Ağaddin BABAYEV,

Lənkəran.
 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !