Nizami Gəncəviyə həsr edilmiş kitabın mədəniyyət gecəsi keçirilib +FOTO=11

Nizami Gəncəviyə həsr edilmiş kitabın mədəniyyət gecəsi keçirilib +FOTO=11

Nizami Gəncəviyə həsr edilmiş kitabın mədəniyyət gecəsi keçirilib

 

“Şairlik şöhrətinin kölgəsində qalmış mütəfəkkir: Nizami Gəncəvinin elmi dünyagörüşü haqqında” kitabının təqdimatına həsr olunmuş mədəniyyət gecəsi keçirilib

 

“Art Council Azerbaijan”ın təşkilatçılığı ilə “Art Tower Terrace”da AMEA prezidenti katibliyinin rəisi, siyasi elmlər üzrə fəlsəfə doktoru, dosent Eldar Əmirovun rus dilində çapdan çıxmış “Şairlik şöhrətinin kölgəsində qalmış mütəfəkkir: Nizami Gəncəvinin elmi dünyagörüşü haqqında” kitabının təqdimatına həsr olunmuş mədəniyyət gecəsi keçirilib.
Tədbirdə AMEA nümayəndələri, Azərbaycanın tanınmış simaları, görkəmli mədəniyyət və incəsənət xadimləri, eləcə də Hindistan, İndoneziya, Fransa və Yunanıstanın ölkəmizdəki səfirləri iştirak ediblər.
Təqdimat mərasimində çıxış edən kitabın müəllifi E.Əmirov əvvəlcə tədbirdə iştirak edən hər kəsə təşəkkürünü bildirib.
Ölkə Prezidenti İlham Əliyevin 5 yanvar 2021-ci il tarixli Sərəncamı ilə cari ilin ölkəmizdə “Nizami Gəncəvi İli” elan edildiyini xatırladan E.Əmirov Nizami Gəncəvinin Azərbaycan və dünya ədəbiyyatı tarixində əvəzsiz rola malik tarixi şəxsiyyətlərdən olduğunu deyib. O, Nizami yaradıcılığının bir il kimi dar bir çərçivəyə sığa bilməyəcəyini vurğulayaraq dahi şairin irsinin Azərbaycan xalqını daimi müşayiət etdiyini bildirib.
“N.Gəncəvi fars dilində yazmasına baxmayaraq, ürəyi hər zaman Azərbaycanla döyünüb”, - deyə qeyd edən E.Əmirov şairin əsərlərində Azərbaycan xalqı ilə yanaşı, Qafqaz Albaniyasında yaşamış amazon qəbilələri, qədim Bərdə şəhərinin təsviri, xalqımızın qəhrəman igidləri və s. ilə bağlı nadir faktlara da yer ayrıldığına diqqət çəkib.
Kitabın müəllifi “Nizami Gəncəvi İli”nin Azərbaycanın möhtəşəm Qələbəsi, qədim Azərbaycan torpaqları olan Qarabağın geri qaytarılması sevinci ilə müşayiət olunduğunu qeyd edərək bunun xalqımız tarixində olduqca əlamətdar hadisələrdən olduğunu bildirib.
O, kitabda şairlik şöhrətinin kölgəsində qalmış mütəfəkkir Nizaminin elmi dünyagörüşü, dahi şəxsiyyətin məhrumiyyətlərlə, itkilərlə, əzmkar mübarizə və kamillik nümunələri ilə dolu həyat yolu, həmçinin yaşadığı, yazıb-yaratdığı mühitin ictimai-siyasi, ədəbi-mədəni xüsusiyyətlərindən bəhs olunduğunu bildirib. E.Əmirovun sözlərinə görə, əsərdə Nizaminin biliyə və alimin cəmiyyətdəki yüksək məqamına verdiyi dəyərə, eləcə də onun elmin əməli əhəmiyyəti haqqındakı fikirlərinə toxunulur. Şairin ictimai-siyasi məsələlərə, təbiət elmlərinə, tibb və psixologiyaya dair baxışlarının təhlili aparılır, o cümlədən “Xəmsə”nin tarixi məxəz olaraq əhəmiyyəti məsələsi konkret hadisələrin və şəxslərin nümunəsində nəzərdən keçirilir.
E.Əmirov vurğulayıb ki, ərəb, fars, türk və digər ölkələrin orta əsr Şərq ədəbiyyatına nəzər saldıqda, yaradıcılığında elmi fikirlərə Nizami qədər yer ayıran ikinci bir sənətkara rast gəlmək mümkün deyil. Dahi mütəfəkkirin “Xəmsə”sini dövrünün ensiklopediyası adlandıran müəllif elm və fəlsəfə tarixində kainatda Yer kürəsindən kənarda aləmlərin mövcudluğuna dair fikirlərin müəllifi kimi əsasən Cordano Brunonun adının çəkilməsinə baxmayaraq, N.Gəncəvinin də əsərlərində bu kimi fikirlərə yer ayırdığını qeyd edib. Əlavə edib ki, “Xosrov və Şirin” poemasında Nizami ulduzların hər birində yaşayışın mövcudluğunu ifadə edib. Lakin Nizami C.Bruno kimi bu fikirləri vahid konsepsiya şəklində deyil, ehtimallara əsaslanaraq təqdim edib. Onun sözlərinə görə, bu faktlar Nizaminin dünyanın quruluşu ilə dərindən maraqlandığını və biliklərə sahib olduğunu göstərir.
“Ümid edirəm ki, yaxın zamanda tərcüməçilərimiz Nizaminin əsərlərinin elmi tərcüməsinin həyata keçirilməsi məsələsinə diqqət yetirəcəklər”, - deyən E.Əmirov kitabın rus dilində yazılmasının səbəbinin də məhz bu amillərlə bağlı olduğunu, Nizaminin elmi və bədii kanonlara uyğun tərcüməyə layiq əsərlər yaratdığını diqqətə çatdırıb.
Tədbirdə iştirak edənlərə kitabın nüsxəsi təqdim olunub.
Təqdimat mərasimindən sonra tədbir bədii hissə ilə davam edib, tanınmış opera ifaçısı Fidan Hacıyeva və digər musiqiçilər tərəfindən “Carmen”, “Tosca”, “Faust” və s. opera və baletlərdən parçalar səsləndirilib.

 

 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !
TƏSİSÇİ və BAŞ REDAKTOR :  R A S İ M     S A D I X O V 
(Sadıxov Rasim Mirzəbala oğlu)