Şirinxanım Kərimbəyli ŞADİMAN: GÖZÜN AYDIN OLSUN, ŞUŞA

Şirinxanım Kərimbəyli ŞADİMAN: GÖZÜN AYDIN OLSUN, ŞUŞA

 GÖZÜN AYDIN OLSUN, ŞUŞA


Əsgərimiz səf bağlayıb düzülübdü sıralara,
Məlhəm çəkir otuz illik köz bağlamış yaralara,
Saf qaliblik sədamızın səsi gedir haralara...
Ordumuzun nərəsindən haray düşüb boz dağa-daşa,
Azadlığın mübarəkdir, gözün aydın olsun, Şuşa!


İndi daha başımız da sinəmizdən qalxacaqdır,
Durna gözlü bulaqların durulaşıb axacaqdır,
Nər oğullar yağıların axırına çıxacaqdır,
Açsın qoynun “Cıdır düzü” soy bildiyi hər yurddaşa,
Azadlığın mübarəkdir, gözün aydın olsun, Şuşa!


Bilirsənmi içimizdə nə müddətdir həsrət gəzir?!
Sən işğala düşən gündən məmləkəti kədər əzir,
Bu gününə canımızı eyləmişik sənə nəzir,
Mənfur düşmən divan tutub, zülüm edib vətəndaşa,
Azadlığın mübarəkdir, gözün aydın olsun, Şuşa!


Bölgə-bölgə yurdlarımız bu xəbəri bayram edir,
Sanki Vətən özü durub soydaşlarla bir kam edir,
Batıb qəlbdə qaranlıqlar, ürəklərlə can şam edir,
Bu payızda qurtuluşun, çıx get deyir qarlı qışa,
Azadlığın mübarəkdir, gözün aydın olsun, Şuşa!


“Qarabağın şikəstəsi” zilə qalxsın gur səs ilən,
Xanəndələr cuşa gəlsin ruhu oxşar nəfəs ilən,
Talan olmuş Qarabağın vidalaşır qəfəs ilən,
Tərk eləsin hicran yurdu, yoxdu daha yer təlaşa,
Azadlığın mübarəkdir, gözün aydın olsun, Şuşa!


Azğınlaşmış mənfur düşmən günbəgündən yolun azdı,
Özün ali saydı yağı, zənn elədi el dayazdı,
Qoy var olsun Baş Komandan, yurda yeni tarix yazdı...
Əsgərimiz azğınların ümidlərin çırpdı daşa,
Azadlığın mübarəkdir, gözün aydın olsun, Şuşa!


Cıdırında yallı gedən düşmənlərin talan oldu,
O basılmaz ordu mifi Ordumuzla yalan oldu,
Yurd yağıdan təmizlənir sənə sarı gələn yoldu...
Bundan sonra min illərlə şiş dağlarda məğrur yaşa,
Azadlığın mübarəkdir, gözün aydın olsun, Şuşa!


Qov dumanı başın üstdən, dumanların keçər olsun,
Əyilib buz bulağından qız-gəlinin içər olsun,
İnnən belə dost-düşməni bir-birindən seçər olsun!
Üzeyirlə, Natəvanla qoy çəkilsin adın qoşa,
Azadlığın mübarəkdir, gözün aydın olsun, Şuşa!


Bilirsən ki, içimizdə möhnət yükü ağır olub,
Abır-həya güdən bəzən yad gözündə fağır olub,
Haqqımızı istəyəndə çox vaxt çığır-bağır olub,
Pənahəli xanın ruhu yurdum deyir hər qarışa,
Azadlığın mübarəkdir, gözün aydın olsun Şuşa!


Bilirsən ki, səni necə azad etdi şanlı əsgər,
Qanın tökdü, şəhid oldu qəlbi vətən canlı əsgər,
Düşmənlərə qan uddurdu, yurda isti qanlı əsgər,
Qalxdı azğın yağılarla qəhrəmanlar haqq savaşa,
Azadlığın mübarəkdir, gözün aydın olsun, Şuşa!


Şadimanın müjdə dolu sözü düşüb kağızlara,
Qurtuluşu misra edən gözü düşüb kağızlara,
Bu zəfəri ərzə yayan salam olsun ağızlara,
Şad xəbərin özəlliyi gətiribdi eli cuşa,
Azadlığın mübarəkdir, gözün aydın olsun, Şuşa!


08.11.2020


***************************************************************


VƏTƏNƏ QURBAN OLSUN


Vətənə qurban olsun tən içində canımız,
Çünki Vətəndir bizim, əzəl-son ünvanımız!


O ruhumuza beşik, dilimizin duası,
Ondan cilalanıbdır damarlarda qanımız.


Düşmənə tapdaq olsa, şərəfimiz alçalar,
Hörmətimiz sozalar, pozular səhmanımız.

 

Dilimiz qısa olar dost-düşmənin içində,
Haqqımız dərdə düşsə, yurd özü loğmanımız.

 

Vətən ata yuvamız, anamızın dilidir,
Yağı əlinə keçsə tapılmaz dərmanımız.

 

Özgə yurdda haçansa ömür sürə bilərik,
Həsrət çalxar ürəyi, qopar ah-amanımız.

 

Ata-ana ölümün pəncəsinə keçəndə
İtgiyə əcəl deyib baş əyir imanımız.

 

Torpaq itirəndəsə bədəndə can hönkürür,
Gecə-gündüz bağır içdəki vicdanımız!

 

Namus-şərəf ölçüsü Vətənin çəkisində,
Onun adına bağlı həmişə ad-sanımız.

 

Vətənə qurban olsun tən içində canımız,
Çünki Vətəndir bizim, əzəl-son ünvanımız!

 

23.07.2020

 

***********************************************************


EY BAHAR


Gəlirsən elə gəl, könüllər gülsün,
Bəzə canım evin gülnən, ey bahar.
Bağrıma İlahi eşqin tökülsün,
Yer-göy sükutdadı dillən, ey bahar.


Şimşəklər hayqırsın, buludlar dolsun,
Açan çiçək qalsın, solan qış olsun,
Çaxnaşsın asiman, bol yağış olsun,
Qon yelin çiyninə yellən, ey bahar.


Yamyaşıl donuna bürün yenə də,
Eşqin şaxələnb, çoxdan sinədə,
Rəvac ver ellərdə toy-düyünə də,
Geyin baş tacını gülnən, ey bahar.


Bilməm nə azardı gəzir dünyanı,
İnsanlar çaşbaşdı, üzür dünyanı,
Eyləmə ağrıya nəzir dünyanı,
Gəl bayram keçirək elnən, ey bahar.


Üşüyən canlardan çıxar mərəzi,
Yaraşmır hüsnünə şeytan qərəzi,
Bilirəm əyilib çoxdan tərəzi...
Yu apar hiyləni selnən, ey bahar.


Bilirsən Novruzun eşqi candadı,
Torpaq dirçəlişdə, həyəcandadı,
Bil sənə sevgimiz kökdə, qandadı,
Bu izah olunmur dilnən ey bahar!


Günlər qaça-qovda, zaman axarı,
Torpaq istilənir çıxır buxarı,
Soyuq yır-yığışda, gəl qalx yuxarı,
Dilləndir qəlbləri telnən, ey bahar.


Günəşin şəfəqi yerlərə enir,
Yer-göy təmas edir, eşqlə öyünür,
Qış ömrün bitirib ocağı sönür,
Oynama sovrulan külnən, ey bahar.


İsindir sevginlə buz ürəkləri,
Gətir ehtizaza sən diləkləri,
Darasın saçımı yaz küləkləri,
Oxşa üz-gözümü əlnən, ey bahar.


Şadiman hövlanak baxır yoluna,
Bitir gül-çiçəkdən gəl sağ-soluna,
Sən gələn yerlərdə könlüm buluna,
Gətir müjdələri yelnən, ey bahar.


15.03.2020

 

**************************************************************

 



 

 

 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !
TƏSİSÇİ və BAŞ REDAKTOR :  R A S İ M     S A D I X O V 
(Sadıxov Rasim Mirzəbala oğlu)
 e-mail:  [email protected]