Bakı Gələcək Forumu keçirilmişdir

AzPress.az xəbər verir ki, Hilton Oteldə “ Azərbaycanın gələcəyi üçün növbəti böyük addımlar : Azərbaycanın Neft sonrası iqtisadiyyatı “ mövzusu çərçivəsində Beynəlxalq Forum keçirilmişdir. I Beynəlxalq Bakı Gələcək Forumu Azərbaycan Respublikası Prezidenti yanında Strateji Araşdırmalar Mərkəzi, Azərbaycan Gələcəyi Tədqiqatlar Cəmiyyəti, Azərbaycan Respublikası Rabitə və İnformasiya Texnoloqiyaları Nazirliyi və Azərbaycan Dövlət İqtisad Universitetinin birgə təşkilatçılığı ilə Azərbaycan Gələcəyi Tədqiqatlar Cəmiyyəti və Minilliyin layihəsinin Azərbaycan bölməsi tərəfindən təşkil edilmişdir. Tədbiri Minilliyin layihəsinin Azərbaycan bölməsi olan Azərbaycan Futuroloqlar Cəmiyyətinin rəhbəri Reyhan Hüseynova açmışdır. Rabitə və İnformasiya Texnologiyaları Naziri Əli Abbasov “ Neft asılılığının arxasında inkişaf edən gələcək informasiya iqtisadiyyatı “ mövzusunda əsas nitqlə çıxış etmişdir. Nazir qeyd etmişdir ki, bu forumun Azərbaycanda keçirilməsi təsadüfi deyildir. İqtisadiyyatı durmadan inkişaf etməkdə olan Azərbaycan dünyada neft ehtiyatlarına görə 19-cu, neft istehsalına görə isə 29-cu ölkədir. Azərbaycan dövlətinin neft amilini insan amilinə çevirmək kimi iqtisadi siyasət xətti son 8-10 il üçün qeyri-neft sektoru hesabına ölkənin iqtisadi potensialını 2 dəfə artırmağa imkan verəcəkdir. Artıq İKT –nin son nailiyyətləri , Nanotexnologiyalardan istifadə olunması bizə dünya bazarında rəqabət aparmağa imkan verir. Biotexnologiyalar sahəsində də artıq müəyyən işlər aparılır. 2015-ci il üçün Yer səthini tədqiq etmək məqsədi ilə süni peyk buraxılması nəzərdə tutulur. Nazir çıxışında onu da qeyd etmişdir ki, İKT artıq həyatımızın hər bir sahəsinə - iqtisadiyyata, sahibkarlığa. elmə, təhsilə və s. nüfuz etməklə yanaşı, həm də bu sahələrin fəal inkişafına yardım edir. Elektron Hökumət Xidmətləri 417 dövlət elektron xidmətindən ibarətdir ki, onun da 35 faizi artıq fəaliyyətdədir. Əhalinin 80 faizi bu xidmətlərdən yararlanır. Təhsil sahəsində İKT-dən istifadəyə görə Azərbaycan irəlidə gedən dövlətlərdən biridir. Əgər əvvəlki illərdə 400 məktəbdə 1500 kompüter var idisə, hal – hazırda bu sahədə Dövlət Proqramının həyata keçirilməsindən sonra hər şagirdə bir kompüter düşməsi yolunda işlər görülmüş və gələn il üçün bu proses yüz faiz reallaşacaqdır. Prezident Administrasiyasının Siyasi təhlil və İnformasiya təminatı şöbəsinin sədri Elnur Aslanov isə öz çıxışında Azərbaycanın Qərblə Şərqin qovşağında yerləşən bir ölkə kimi yüksək dəyərlərə malik olduğunu qonaqlara çatdırdı. Tolerantlığı ilə fərqlənən dövlətimizin ulu öndər Heydər Əliyev tərəfindən əsası qoyulmuş neft strategiyasının uğurlu nəticələri, eyni zamanda həm də Avropa təhlükəsizliyinin qarantıdır. On mindən çox tələbəmiz dövlət hesabına xaricdə təhsil alır. Elnur Aslanov torpaqlarımızı işğal etmiş Ermənistanın BMT Təhlükəsizlik Şurasının qəbul etdiyi qətnamələrə etinasız yanaşdığını da qonaqlara çatdırdı. Natiq çıxışının sonumda Forum iştirakçılarına uğurlar dilədi. Ekologiya və Təbii Sərvətlər Naziri Hüseyn Bağırov çıxışında bir çox maraqlı faktlar gətirərək,təbii sərvətlərimizi, xüsusən, meşələrin qorunulub saxlanmasının əhəmiyyətindən danışdı. Açılış nitqləri və panel müzakirələrində xarici ölkələri təmsil edən ekspert və mütəxəssislər də çıxışlar etdi. Minillik layihəsinin direktoru Jerom Qlenn (ABŞ) , Monteneqro Elm və bilik Naziri xanım Sanya Vilahoviç, Roki Mauntin İnstitutu nümayəndəsi Amori Lovins (ABŞ) , UNESCO –nun Proqnozlaşdırma Departamentinin rəhbəri Reyl Miller və digər təmsilçilər maraqlı, yaddaqalan çıxışlar etdilər. “Gələcəyin iqtisadiyyatında enerjinin gələcəyi və enerji səmərəliliyi “, “ İKT –nin Neft sonrası iqtisadiyyatda strateji rolu “, “ Nanotexnologiyalar və gələcək iqtisadiyyatlar “ , “Sintetik biologiya “ panellərində müzakirə edilən mövzular ətrafında Azərbaycan Parlamentinin deputatı Asaf Hacıyev, Azərbaycan Mərkəzi Bankının Sədr müavini Xaqani Abdullayev, Azərkocmos Agentliyinin Sədri Rəşad Nəbiyev də çıxış etmişlər. Tədbir zamanı holoqrafik təqdimat baş tutmuşdur. Çıxışlar Azərbaycan və ingilis dillərində edilmişdir . Bütün Forum boyunca Minilliyin layihəsinin Təcrübi Kiber Bölməsinin sədri Frenk Katanzaro (ABŞ) ilə canlı bağlantı yaradılmışdır. Forumda ABŞ, Kanada, Meksika, Venesuela, Uruqvay, Braziliya, Çili, Finlandiya, Çernoqoriya, Sloveniya, Rumıniya, Polşa, Çexiya, Rusiya, Fransa, Almaniya, İspaniya, Belçika, Böyük Britaniya, Cənubi Koreya, Çin, İsrail, Türkiyə, İran, Misir, Keniya , Cənubi Afrika Respublikasından olan mütəxəssislər iştirak etmişlər. Forum gün ərzində öz işini davam etdirmişdir.
Sevinc Rzaqızı