Daşkənddə Azərbaycan-Özbəkistan ədəbi əlaqələrinə həsr olunan tədbir keçirilib - -FOTO=11

Daşkənddə Azərbaycan-Özbəkistan ədəbi əlaqələrinə həsr olunan tədbir keçirilib -FOTO=11

Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü ilə Daşkənd Toxuculuq və Yüngül Sənaye İnstitunda Azərbaycan-Özbəkistan ədəbi əlaqələrinə həsr olunan tədbir keçirilib.
Əvvəl foyedə təşkil olunmuş sərgidə ölkəmizin bayrağı, Ulu Öndər Heydər Əliyevin həyat və fəaliyyəti, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, “Qarabağ həqiqətləri” seriyasından Heydər Əliyev Fondu tərəfindən rus və ingilis dillərində çap edilən nəşrlər, Azərbaycanın tarixi və mədəniyyəti ilə bağlı əsərlər, suvenirlər nümayiş etdirilib.
Kitablar arasında Heydər Əliyev adına Azərbaycan Mədəniyyət Mərkəzinin Daşkənddə özbək dilində çap etdirdiyi nəşrlər, o cümlədən böyük Azərbaycan şairi Nizami Gəncəvinin “Xəmsə”si, İmadəddin Nəsiminin “Cananı sevərmən” kitabı, Məhəmməd Füzulinin əsərləri və digər toplular olub.
İnstitutun müəllimi, dosent Firuza İkramxanova Azərbaycan-Özbəkistan ədəbi əlaqələrindən danışıb, bildirib ki, son illər bu sahədə böyük uğurlar olub, Azərbaycanın şair və yazıçıları Özbəkistana gəlir, özbək yazarları Bakıya gedir.
Özbəkistan Yazıçılar ittifaqının üzvü Adxambek Olimbekov Mədəniyyət Mərkəzinin Azərbaycan şair və yazıçılarının özbək dilində çap etdirdiyi kitablardan danışıb, ədəbi əlaqələrin inkişafında bu nəşrlərin böyük rolu olduğunu diqqətə çatdırıb.
Mərkəzin əməkdaşı Kifayət Pirməmmədova Azərbaycanın tarixi, ədəbiyyatı, mədəniyyəti haqqında məlumat verib, tələbələrin suallarını cavablandırıb.
Tələbələr Nizami Gəncəvi, Məhəmməd Füzuli, İmadəddin Nəsiminin şerlərini söyləyib, Özbəkistandakı Heydər Əliyev adına Azərbaycan Mədəniyyət Mərkəzinin nəzdindəki “Azərbaycan qızları” rəqs ansamblının üzvləri milli rəqslərimizi ifa edib.
 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !