Şirin xanım Kərimbəyli Şadiman : - İlAXIR ÇƏRŞƏNBƏ

Şirin xanım Kərimbəyli Şadiman : İlAXIR ÇƏRŞƏNBƏ

Ruhumun içindən boylanır yenə,
Şövqlə ürəyimi basır köksünə,
Eşqini sel təki qucaqlar sinə,
Oduyla könlümü yaxır çərşənbə,
Novruzun gözəli axır çərşənbə!

 

Ey güldən, çiçəkdən müjdəli xatın,
Bahar sevdasına bağlı həyatın,
Möcüzə boğçası sən kainatın,
Qapı-pəncərədən baxır çərşənbə,
Novruzun gözəli axır çərşənbə!

 

Torpağın dirilik sorağı səndə,
Yerlərin, göylərin marağı səndə,
Günəşin gur tonqal çırağı səndə,
Qəlbimdə şimşəktək çaxır çərşənbə,
Novruzun gözəli axır çərşənbə!

 

Şaxta dizin bükər düşər üz üstə,
Tonqallar qalanar, yanar köz üstə,
Şamları düzülər xonçalar üstə,
Torpağı dirildib çıxır çərşənbə,
Novruzun gözəli axır çərşənbə!

 

Bütün kin-küdurət əriyib gedir,
Yellər qış-sazağı sürüyüb gedir,
Quşların sədası yaza eşq edir,
Dərdi künc-bucağa sıxır çərşənbə,
Novruzun gözəli axır çərşənbə!

 

Dur gəl Şadimanın ruhuyla oyna,
Dolaş qəlb evində eşqiylə qayna,
Torpağın bağrından boylanan ayna,
Misrama şamların taxır çərşənbə,
Novruzun gözəli axır çərşənbə!


14.03.2017
Şirin Xanım Kərimbəyli Şadiman

 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !