RODRİQO MAYA: - BRAZİLİYA AZƏRBAYCANIN ƏRAZİ BÜTÖVLÜYÜNÜ DƏSTƏKLƏYİR

RODRİQO MAYA: “BRAZİLİYA AZƏRBAYCANIN ƏRAZİ BÜTÖVLÜYÜNÜ DƏSTƏKLƏYİR”

Oktyabrın 31-də Milli Məclisin Sədri Oqtay Əsədov ölkəmizdə rəsmi səfərdə olan Braziliya Federativ Respublikası Milli Konqresinin Deputatlar Palatasının Sədri Rodriqo Mayanın başçılıq etdiyi nümayəndə heyəti ilə görüşdü.
Sədr qonağı səmimi salamlayaraq, onun ölkəsinin Deputatlar Palatasının sədri kimi Azərbaycana ilk səfərinin dövlətlərarası və parlamentlərarası münasibətlərimizdə yeni imkanlar açacağına inamını ifadə etdi. Bildirildi ki, Azərbaycanla Braziliya arasında müxtəlif səviyyəli dialoq və əməkdaşlıq əlaqələri mövcuddur. Biz Latın Amerikası dövlətləri ilə daha sıx əlaqələrin qurulmasında Braziliyanın dəstəyində maraqlıyıq. BMT və digər beynəlxalq təşkilatlar çərçivəsində beynəlxalq hüququn norma və prinsiplərinə söykənmiş münasibətlərimizin inkişafı üçün yaxşı imkanlar vardır.
Biz siyasi dialoqun daha da dərinləşməsinin iqtisadi əlaqələrimizə müsbət təsir göstərəcəyinə inanırıq. Münasibətlərimizdə iqtisadi fəallığı artırmaq üçün Hökumətlərarası Komissiyanın yaradılmasına və biznes-forumların keçirilməsinə ehtiyac vardır. 2015-ci ildə ölkələrimiz arasında ticarət dövriyyəsinin həcmi 120 milyon ABŞ dollarına yaxın olmuşdur. Bu ilin təkcə 9 ayı ərzində isə bu göstərici 150 milyona çatmışdır. Buna baxmayaraq, biz iqtisadiyyatın ən müxtəlif sahələrində əməkdaşlığı genişləndirmək niyyətindəyik.
Parlamentlər səviyyəsində əlaqələrimizin dərinləşməsində hər iki ölkənin qanunvericilik orqanlarında dostluq qruplarının fəaliyyət göstərməsi təqdirəlayiqdir. Zənnimizcə, deputatların qarşılıqlı səfərləri və görüşləri bu sahədə əməkdaşlığımızı yeni mərhələyə qaldırmaq üçün əhəmiyyətli vasitə ola bilər.
Söhbətdə Dağlıq Qarabağ problemindən söz açan Sədr problemin dinamik inkişaf edən Azərbaycan ictimaiyyətini narahat edən bir nömrəli məsələ olduğunu vurğuladı. Spiker Braziliyanın ölkəmizin ərazi bütövlüyünü dəstəkləməsini yüksək dəyərləndirdi.
Qeyd edildi ki, Rodriqo Maya hələ 2013-cü ildə Parlamentdə komitə sədri olduğu vaxt onun təşəbbüsü ilə qəbul olunmuş sənəddə erməni işğalını ifşa edən və Azərbaycanın ərazi bütövlüyünü dəstəkləyən bəndlər öz əksini tapmışdır. Sədr daha sonra dedi ki, Siz və atanız, görkəmli ictimai-siyasi xadim Sezar Maya Azərbaycanın dostu kimi həmişə bu məsələdə prinsipial və obyektiv mövqe tutmuş, cari ilin aprel ayında cəbhə xəttində Ermənistanın işğalçı hərəkətlərini pisləyən və Azərbaycanın mövqeyini müdafiə edən bəyanatla çıxış etmişsiniz. Buna görə Sizə öz minnətdarlığımı bildirirəm. Ümid edirik ki, yaxın gələcəkdə Braziliya Milli Konqresinin Senatında və Deputatlar Palatasında erməni işğalını qınayan və bu hərəkətlərə layiqli qiymət verən sənədlər qəbul ediləcəkdir.
Spiker 2016-cı ilin martında Braziliyanın Rio de Janeyro şəhərində Azərbaycan Respublikasının adını daşıyan yeni inşa edilmiş bələdiyyə məktəbinin açılmasında qonağın dəstəyini yüksək qiymətləndirdi. Bildirildi ki, ölkələrimiz arasında mədəni-humanitar əlaqələrin inkişaf etdirilməsində onun böyük rolu olmuşdur.
Ötən ilin yanvarında Rio de Janeyro şəhərində Bakı ilə bu şəhər arasında əməkdaşlıq haqqında protokolun imzalanmasını biz yüksək qiymətləndiririk. İnanırıq ki, həyatın bütün sahələrində əlaqələrimiz bundan sonra da yüksələn xətlə inkişaf edəcəkdir.
Səmimi qəbul üçün minnətdarlığını bildirən Braziliya Federativ Respublikası Milli Konqresinin Deputatlar Palatasının Sədri Rodriqo Maya ölkəmizə səfərindən və burada gördüklərindən məmnun qaldığını söylədi. Bildirildi ki, səfərdən əsas məqsəd dostluq və qarşılıqlı əməkdaşlıq əlaqələrini gücləndirmək üçün fikir mübadiləsi aparmaqdır. Ölkələrimiz arasında neft, qaz, turizm, iqtisadiyyatın digər sahələrində əməkdaşlığı dərinləşdirmək üçün geniş imkanlar vardır.
Braziliya Dağlıq Qarabağ probleminin həllində münaqişənin çözülməsi üçün BMT-nin qətnamələrində öz əksini tapmış müddəaların yerinə yetirilməsini önəmli hesab edir və Azərbaycanın ərazi bütövlüyünü dəstəkləyir. Qonaq vurğuladı ki, ölkəsi Qafqazın bu bölgəsinə böyük maraq göstərir və gələcəkdə parlamentlərarası, iqtisadi, mədəni, humanitar sahələrdə münasibətləri dərinləşdirmək üçün lazımi addımlar atmaq niyyətindədir.
Görüşün sonunda Sədr bildirdi ki, bu il fevralın 28-də Azərbaycan Respublikası ilə Braziliya Federativ Respublikası arasında dostluq əlaqələrinin inkişafında xidmətlərinə görə Azərbaycan Respublikası Prezidentinin sərəncamına əsasən Braziliya Federativ Respublikası Milli Konqresi Deputatlar Palatasının Sədri cənab Rodriqo Maya Fəxri diplomla təltif olunmuşdur.
Sonra Sədr Fəxri diplomu qonağa təqdim etdi.
Görüşdə Milli Məclis Sədrinin birinci müavini Ziyafət Əsgərov, Sədr müavinləri Bahar Muradova, Valeh Ələsgərov, parlament Aparatının rəhbəri Səfa Mirzəyev, ölkəmizin Braziliyadakı səfiri Elnur Sultanov, Braziliyanın Azərbaycandakı səfiri Santiaqo Alkazar və digər rəsmi şəxslər iştirak edirdilər. 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !