Sona Vəliyeva : - Payız etüdləri

Sona Vəliyeva : Payız etüdləri

Payızın dilində şeir yazıram
İçimdə, çölümdə payız nəğməsi.
Yarpaq qırğınıdır, məşhər başlayıb
Yoxdu ağacların ağlayan kəsi.

 

İstədim əlini tutam payızın
Ruhunu oxşayam, dərdini böləm.
Yağışa qarışam kimsə görməyə
Ya da durnalara qoşulam gedəm.

 

Getsəm nə dəyişər, qalsam, nə bilim
Zamanla köçəni saxlamaq olmur.
Ölümün bildiyim xəstə anamtək
Payız elə kövrək ayrılmaq olmur.

 

Bu payız fərqlimi, ruhum qəribmi,
Ya qismət bahara yetə arzular.
İçim yarpaq –yarpaq talanıb gedir,
Bu dəli küləyi durdurun bir az.

 

Çinar öz yarasın qorusa belə,
Yarpaq balaları qoruya bilmir.
İlahi, qarşıdan hələ qış gəlir
Gecikən sevgi tək bu bəyaz çiçək,
Tufanı tanımır, çovğunu bilmir.

 

Yarpaq məzarlığı bağa göz dağı,
Ya qismət, bahara yetə arzular.
Tumurcuq diləklər Tanrı töhfəsi
Bir az təpər versək bitər sevdalar.

 

Həsrətin ölçüsü payızmış elə
Qarışla , arşınla ölçülməz demək.
Ayrılığın rəngin görmək istəyən
Saralan yarpağa toxunsun gərək.

 

Ağacam bu payız dağ sinəsində
Məni görməyiniz duymanız çətin
Ruhumu dumana, yağışa bükün
Badam ağacının çiçəkləriylə
Bahar qayıdanda bəlkə göyərdim.


24.11.2014
Sona Vəliyeva

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !