Sona Vəliyeva: - YOLLAR

Sona Vəliyeva: YOLLAR

YOLLAR


Bənövşə ətirli, Araz nisgilli,
Yollarım sərhədsiz dünyamla birdi.
Ulduzlar yoluma çıraq tutanım,
Yerlər ayağıma çiçək səpirdi.


İndi səbrim kimi itərəm yolda,
Xəyal qanadına götürər məni.
Salam, anamsız ev, gec gəlib çıxdım,
Mən yolu qınaram, bu yerlər məni.


Min qınaq bir borcu ödəyə bilməz,
Ölənə, itənə çatmaq da çətin.
Yolu tək ümidi qeyb olanlara
Mənim qollarımı körpü eləyin.


Atamdır, Anamdır qırılan yollar,
İncik naləsindən sızlayır ürək.
Gedib ovutmağa üzümüz hanı,
Könlünü almağa kimi göndərək?


Yol əsir, yol küskün, neyləyək, Allah,
Leylasız Məcnundur insansız yollar.
Karvanı kəsilib, qatarı gedib,
Damar tək qoruyur bu cansız yollar. 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !